ගී පද
නීල නෙතු යුග දිලෙන තරමට රහස මම දුටුවා
කෝළ බැල්මෙන් මුවඟ සිනහව ආදරෙයි කීවා
රෝස පාටින් දිලෙන දෙකොපුල හාදුවක් සෙව්වා
කොහේ සිට දෝ පැමිණියේ නුඹ මගේ සිත කීවා
තෙමුණු දෙතොලින් බේරි බේරී නුරා රස සොයනා
දුහුල් සළුවෙන් වෙලුනු ඉඟසුඟ සිතුවමක් මැවුණා
ගමන හැඩකර ගතම නළවන කිඳුරියක හැඟුණා
කොහේ සිට ඔබ පැමිණියේදෝ මගේ සිත කීවා
හවුළුවා සිත දැහැන් බිඳලා නුඹෙ රුවම සොයනා
සිහින ලොවකට ගෙන ගියේ මා නුඹෙ සුරතේ පටලා
සරාගී නුඹ ගියාදෝ අද මගේ සිත දවලා
කොහේ සිට දෝ පැමිණියේ නුඹ මගේ සිත සොයලා
නීල නෙතු යුග දිලෙන තරමට රහස මම දුටුවා
කොහේ සිට දෝ පැමිණියේ නුඹ මගේ සිත කීවා